معاناة شاب جزائري اثناء الخطبة

السلام عليكم
نصحوني اصحابي مرة بالزواج .....وقالوا لي بركاك من التعواج
واهي رايحة ترميك الامواج ....اذا بقيت في بحر العزوبية
بقيت في الليل نطلع الحساب......ولقيت كلامهم صواب
وفي الغد بعثتهم نواب .......يطرحوا لاهلي القضية
بابا وافق في الحال ......وقال جيبوا بنت الخال
ويما جاها في البال.....تخطب لي وحدة بدوية
تفاهمنا على بنت المدينة ......قالوا راها فاهمة ورزينة
راهي تخمخم في الكوزينة ....تطبخ طبخات شهية
عولنا قصدنا الدار....حاملين في يدينا النوار
ودرنا رواحنا زوار .....قاصدين البنت المعنية
الراجل يشكر في بنته و يزيد.......قارية ما تركت مسيد
وصحيحة كالحديد .....بنت العلم والتربية
قلت واش هي الشروط ...راني صرت بيكم مربوط
ومالي عندكم محطوط .....ونزيد لكم الشهرية
قال لي يا وليدي سجل .....عشرين صباط باش تبدل
وخمسين سروال مفصل ......ويكونوا ضيقين شوي
وزيد كيلوا ذهب صافي ......وتجيبوا وانت زاهي
والشنتوف ماهو كافي ......راني درت فيك مزية
بنتي راهي غالية وشريفة .......ماتتركش يديها خفيفة
عشرين خاتم في قفيفة.......وتحطهم في يديها هي
كرفاش بولحية ماتنساش ....والمليون لازم يكون معاه
والحايك لازم منو تلقاه .....وتقدموا لبنتي هدية
قال لي اسمع يا سي موح ........بلاك تنسى خيط الروح
باش يزيد لبنتي في الروح........وتبقا ديما حية
تشري لها عشرين لكباش ......والجاج المشوي ماتنساش
جابو لي العروس للبيت ...وكي شوفتها من الخوف بكيت
قالت لي لازمني نبقى حرة .....ويماك لازم ترميها برة
وما تكثرش من الهدرة ......راني طفلة حضرية
قالت خف اطلع البرمي .....قلت يا امراه لازم تفهميني
ترفدي حوايجك وتلمي ......وتطيري اليوم عليه

الكاتب : فارس العرب

مع السلامة

هدا راجل عجبتني الكلمة هده

ترفدي حوايجك وتلمي ......وتطيري اليوم عليه

تقريبا حقيقة الكلام هدا واش صاير في الزواج في هدا الجيل بدع

نعم هذا واش صاير لكن ماشي لهاد الدرجة لتكون بنت وزير ولا كاش حاجة كبيرة على مستوى العالم لا ماشي كما هاك يقولو ناس زمان كلتا ولاد تسع شهور ونزيد نقول حاجة الشباب تاع اليوم يتزوج مرا ينسى أمه لكن انا نقواو لا إذا كان عندك سكنة لوحدك الله يبارك إذا كانك زوالي تزوج بوحدة تقدرالأم ودير بالك تسمع كلمة مرتك في كل شي خاصة من جهة يماكوماتدخلش بيناتهم لا ترضب مرتك لا تسب يماك خليهم نساء في بعضاهم يعرفوا يحلوا مشاكلهم

وزيد الرسول عليه الصلاة والسلام قال " أقلكم مهرا أكثركم بركة" يا ريت نفهموا هاد المعنى ونخدموا بيه تولي الدنيا بخير